Fysikk i barnehagen

Tysdag 19.februar var 8.klasse på besøk i barnehagen. Vi besøkte Hovdan, altså dei eldste barna. Fyrst viste vi dei våre triks, deretter viste dei oss nokre triks. Nokon av triksa vi gjorde var:

•         Tenne på pengar, utan at dei brenn opp.
•         Stå på vaffelrøre, utan å synke.
•          2 skumvulkaner
•        Cola og mentos vulkan

Vi trur og håpar at barnehagen likte det vi gjorde og kanskje vi kan komme attende ein annan gong, vi synes dette var eit artig opplegg.

Etter vi var ferdige skulle nokre av barna også gjere nokon triks, dei laga ein undervannsvulkan og hang ei teskei på nasen. Dei hadde også eit veldig artig triks, dei blåste opp ca.15-20 ballongar i lik størrelse, la dei på golvet og sette eit bord opp ned på ballongane. Etter det stod på bordet, vi var ca.10 personar oppå bordet, ballongane sprakk etter litt. Til slutt åt vi nistepakka vår saman med barnehagebarna og gjekk til skulen att.

Fartsmåling

Klassekameratane våre i forsking i praksis har målt farta på bilane som køyrer forbi skulen. Fire stykkar måla farta gjennom 150 meter. Dei skreiv opp tida og merke på bilen. Etterpå målte dei gjennomsnittet. Mange av bilane bremsa ned eller køyrd inn ein annan stad, det verka som dei trudde dei var politiet. Alle var engasjerte i målingane og alle hjelp til i måle opp dei 150 meterane.

Kvardag

På bloggen har vi skrive om spesielle hendingar som turar, nyttårsball osv. Det vi ikkje har snakka noko om er vanlege timar og undervisning. Korleis er eigentleg kvardagen for ein elev i åttande klasse ved Lesjaskog skule.

Fyrste timen brukar å vere litt ”daud”, men utover dagen blir det som oftast litt meir liv i oss. Siste timen kan også vera litt ”daud”  til tider. Fyrste timen er ”daud” fordi vi kanskje er litt trøtte, som oftast vore oppe litt for lenge kvelden før, siste timen fordi då byrjar vi bli kjei og lei. Undervisninga foregår ved at vi sitt ved studiepultane våre eller ved midtborda. Læraren står ved tavla, skriv litt og pratar, vi noterer. Vi kan også ha gruppearbeid, då sitt vi i små grupper på 2-4 personar. Dei fleste ynskjer å lage power-point når vi har gruppearbeid, for då kan vi nytte pc, samtidig som vi jobbar.

Nå som vi går på ungdomsskulen har vi ein del lekse, når vi kjem heim kan vi ha alt frå 10minutt til 1time der vi sitt å gjer lekse. Vi har også innleveringar og rapportar som vi skal levere til da og da. Når vi har det leverer vi som oftast på ”its learning”, men nokon gonger leverer vi på minnepenn til læraren. Vi får også karakter vurdering på nesten alt vi leverer inn av tekstar og rapportar.

I løpet av ein skuledag har vi 3 friminutt, 2 korte og eit langt. Dei fleste 8.klassingane er inne i kantina eller så spelar dei ping-pong i Vesterbyla. Det er også nokre som er ute i friminutta. I det lengste friminuttet spiser vi. Nokre spiser på klasserommet, og nokon spiser i kantina. I kantina er det og’ mogleg å kjøpe seg drikke og mat. Når det lengste friminuttet er over er det trimkvart.

Korleis overleve ein vanleg skuledag på Lesjaskog skule:

• Ver utkvilt. Legg deg tidleg nokk slik at du er utkvilt til neste skuledag.
• Følg med. Følg med i timane og viss du syns faget er kjedeleg eller at læraren ikkje er så ”kul”, så bare lat som om du følgjar med, læraren blir så glad for det.
• Ver kreativ. Ha ein god og kreativ matpakke, da er det meir fristane å ete ho. Lag den sjølv slik at du veit at du likar ho. Og viss du ikkje gidder å lage ho på morgonen så gjer det om kvelden og sett den i kjøleskåpet.
• Et godt. Hugs å ete godt. Det blir faktisk meir interessant viss du har mat i magen. Hugs: frukost er dagens viktigaste måltid!
• Ver positiv!

Håper dette vil bli bra!

Intervju om trimkvart

Vi har intervjua 5 ungdomskuleelevar om trimkvart. Her er eit samandrag av det dei svarte:

Kva synes du om trimkvart? Keisamt, helt greitt.

Kunne noko vore betre? Kva? Meir variert og at 8-10 klasse burde vere inne i friminuttet.

Er det bra organisert? Av og til.

Kva er artigast? Dans, ballspel og å sleppe timar.

Vi intervjua og nokon frå mellomtrinnet for å sjå om det var nokon forskjell:

Kva synes du om trimkvart? Keisamt, kunne vore betre!

Kva kunne vore betre? Det skulle ikkje tatt tid frå friminuttet, meir leik i staden for tur.

Er det bra organisert? Ja.

Kva er artigast? Å vere i gymsalen, gå tur og kanonball.

Våre meiningar om trimkvart er:

Vi er einige om at det er ganske keisamt og langdrygt.

Våre forslag til kva som kunne vore betre er om vi kunne vore meir inne i gymsalen, hatt meir kanonball, volleyball, frisbee osv.

Vi tenkjer at det er heilt greitt organisert, kunne vore betre.

Vi synes aktivitetane på sommaren er artigast. 

Frå ein lærars ståstad:
Det er ikkje viktig at Lesjaskog skule var ein av fem nominerte skular til aktivitetsprisen 2012 i Oppland. Konkurransen i regi av fylket var viktig fordi vi kom i gang med noko som er like viktig som å eta og lesa: å vera fysisk aktive kvar dag. Du blir ikkje sprek av å vera med på 20 min fysak ved Lesjaskog skule kvar skuledag, men skuledagen blir betre, og vi trur på at du som elev lærer meir. Vi er ikkje laga for å sitje i ro, difor er dette naudsynt.

Vi forsøker å lage varierte aktivitetar både ute og inne. Elevane på ungdomstrinnet har og ansvar for å lage opplegg. Ein klarer aldri å gjera alle nøgde, men alle får brukt kroppen sin.

Ola-Matti

Vi har også intervjua rektoren på Lesjaskog skule, Åge Paulsrud, om kva han meiner om trimkvart.

Kva er grunnen til at vi starta med trimkvart?

Utgangspunktet var at alle lærarane var på ein planleggingsdag på Otta og vart inspirert til å delta på ein konkurranse der ein kan vinne 70 000 kr. til eigen skule. Skulen rydda plass på timeplanen, slik at vi fekk 20 minutt med fysisk aktivitet kvar dag, frå 1. februar. 2012 og vidare ut skuleåret. Betydinga av fysisk aktivitet for læring vart veldig tydeleg dokumentert på denne planleggingsdagen.

Korleis har vi organisert det?

Vi har tatt 10 minutt ut av undervisningstida rett etter langfri og elevane har gjeve 10 minuttar av langfri kvar dag for at vi skal få 20 minutt samanhengande trim. Elevane er delt i to med 39 elevar på kvar gruppe. Lærarar har ansvar for kvar si gruppe.

Kvifor kan vi droppe vanlege timar, og heller ha trimkvart?

Fordi det er dokumentert at fysisk aktivitet er viktig for evna til å lære, og fordi det er sosialt og bra for skulen å gjere noko i fellesskap.

Kva trur du elevane synes om trimkvart? Trur du dei er positive eller negative til trim?

Mitt inntrykk er at det er mest positive haldningar til denne aktiviteten.